Müdafiə Nazirliyinin tabeliyində olan hərbi hospitallardan birində çəkilmiş “dedovşina” çarxı ilə bağlı Respublika Hərbi Prokurorluğu hələ videoçarx yayılmazdan əvvəl cinayət işi başlayıb.

Məlumat Lent.az-a Hərbi Prokurorluqdan verilib. Məlumatda bildirilir ki, bir neçə gün öncədən həmin fakt Hərbi Prokurorluğa bəlli olub və araşdırmalar başlayıb: “Fakt üzrə Cinayət Məcəlləsinin 332.2 (Tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma) maddəsi ilə cinayət işi başlanıb. Həmin cinayət əməlini törətməkdə təqsirli bilinən 1 nəfər artıq tutulub. Hazırda istintaq davam edir”.
Hərbi Prokurorluqdan hadisənin baş verdiyi yer bildirilməsə də, əvvəldən xəbər verdiyimiz kimi, Lent.az-a daxil olan məlumata görə, hadisə Ələt qəsəbəsində yerləşən hospitalda baş verib.
Videoçarxın məzmunu belədir: hospitalın palatasında çarpayıda uzanan mülki geyimli şəxs, gənc əsgər olduqları güman edilən 5 nəfəri otaqdakı boş çarpayıda uzanmaq haqqını qazanmaq uğrunda bir-biri ilə vuruşdurur. Təhqiramiz səhnələrdə qorxudulmuş əsgərlər bir-birini döyür, əmr verən şəxs isə onların hərəkətlərini gülərək seyr edir. Maraqlıdır ki, səhnə əmr verən şəxsin yanında, aydın görünür ki, həm də xəbəri ola-ola çəkilib.
Müdafiə Nazirliyinin mətbuat xidmətinin rəhbəri Eldar Sabiroğlu isə Lent.az-a bildirib ki, həmin çarxla bağlı araşdırma aparılır: “Nazirlikdə bununla bağlı ciddi şəkildə araşdırmalara başlanılıb. Əgər bu öz təsdiqini tapsa, ölçü götürüləcək, həmin şəxs kimliyindən asılı olmayaraq cəzalandırılacaq”./